Fyrir viku síðan var busun í sjúkraþjálfunarskori. Já..... busun ! Það er víst hefð innan deildarinnar að 2.árs nemar busi nýnemana. það var búið að segja mér að ég mætti alls ekki missa af busuninni.... það væri alltaf þvílíkt gaman... þannig að auðvitað skellti ég mér. Og mikið rétt... það var alger snilld.... mikið hlegið   Við fengum þau fyrirmæli að mæta í sundbol og íþróttabuxum sem og við gerðum. Svo var bundið fyrir augun á okkur og við leidd inn 2 í einu. Þar vorum við m.a. bundið saman og látin skríða upp stigana  (vorum reyndar rassskelld nokkrum sinnum á leiðinni) og svo þegar upp var komið tók við Guantanamo yfirheyrslu stemning með sterkum ljósum og argi. Einnig var okkur stillt upp á mynd með hálfnöktum gaur, drukkum bjór og staup, látin taka endalaust af armbeygjum og fleira skemmtilegt. Ég er mjög ánægð með að hafa skellt mér..... góð leið til að kynnast hópnum aðeins

Nú er maður orðin skólastelpa á ný. Jibbí Ég byrjaði í skólanum á mánudaginn og líst mjög vel á þetta. Sjúkraþjálfunin er kennd í hlíðunum og erum við eina deildin í húsinu. Það virðist ríkja mjög hómí stemning þarna.... það er m.a. eldhús með eldhúsinnréttingu, bakaraofni, ísskáp og öllu tilheyrandi. Hélt þetta væri smá kaffistofa... en nei þetta er eldhús. Ég leyfi mér þó að efast um að bakaraofninn sé mikið notaður. Við erum rétt yfir 20 í bekknum, sýnist þetta vera hresst og skemmtilegt fólk... vona það allavega Það virðist tíðkast að busa nýnema í sjúkraþjálfun......hmm..... það á að gerast á föstudaginn. Heyrði að sennilega yrði okkur skellt í sundbol og eitthvað.....Það vill reyndar svo vel til að ég kemst sennilega ekki í busunina, er að kenna á sama tíma. Græt það ekki. Í dag var fyrsti dagurinn sem ég þurfti að mæta kl. 8. Ég lenti í umferð frá helvíti og var óratíma í skólann.... alveg mein stygg Hér eftir legg ég af stað hálftíma áður en tíminn byrjar.

Mér skilst að september verði sæmilegt vinnuálag á okkur og svo í okt byrji líffæra- vefja og fósturfræði sem sé dauði og djöfull. Ég mun því ekki eiga mikið líf fram í a.m.k. febrúar. Gæti þó vælt aðeins hér á blogginu mínu, þar sem þetta er mín síða.....mín, mín, mín

Ég er orðin íbúðaeigandi. Skrifaði undir kaupsamning í gær og fæ íbúðin á morgun Þetta er tveggja herbergja íbúð, 71 fm, mjög sæt og fín með stórum svölum. Lovely lovely lovely. Ég mun þó byrja á að leigja hana út þar sem ég er að fara í skóla í haust. Það vill svo heppilega til að Jógu beibí og manninum hennar vantar einmitt íbúð núna. Helvíti heppilegt.

Þar sem ég er að kaupa íbúð var ég búin að ákveða að fara ekkert um verslunarmannahelgina. En nú þegar helgin er komin þá er ég algerlega friðlaus af eyja sýki. Ég engist þegar ég sé myndir frá eyjum.... langar svo að fara. Í gærkvöldi tók sýkin öll völd og ég fór að kynda yndir tveimur vinkonunum mínum sem líklegastar væru til að skella sér. Þær voru báðar heitar fyrir eyjum en önnur þeirra á ekki pening og hin getur ekki farið af öðrum ástæðum. Alveg glatað Á næsta ári ætla ég annað hvort að vera erlendis eða í góðra vina hópi í eyjum (sem er mesta snilld). Ármann bróðir fór í fyrsta skipti til eyja nú í ár. Hann er alsæll með ferðina enn sem komið er, enda ekki annað hægt.... sól og fínt veður. Ég verð hins vegar í vinnunni (þar sem ég ætlaði ekki að fara neitt) og engist. Grát grát

Ég er lengi búin að ætla mér að lesa flugdrekahlauparann og byrjaði loks á henni á föstudaginn. Þessi bók er mögnuð. Hún nær einhvernveginn að hringa sig utan um hjarta manns og kreista. Hún er svo listilega vel skrifuð að maður sér fyrir sér allt umhverfið og persónurnar verða ljóslifandi. Mér finnst eins og rithöfundurinn sé að skrifa ævisögu sína (þó það sé ekki svo).... eins og perónurnar í bókinni hafi verið til í raun og veru, göturnar í kring hafi verið nákvæmlega svona á þessum tíma, granateplatréð hafi staðið nákvæmlega þarna í þessum garði í þessum bæ. Sagan er þannig að maður veit að eitthvað slæmt mun gerast sem verður vendipunktur í sögunni.... ég var komin með ónot í magan vegna ótta um að illa færi fyrir sakleysingja sögunnar sem á allt hið besta skilið en hefur bágt og ósanngjarnt hlutskipti í lífinu. Ég man ekki eftir að hafa grátið yfir bók áður, en ég gerði það yfir þessari. Það er þó alls ekki svo að bókin sé ein vælusaga heldur er hún freka grípandi, átakanleg og mannleg saga um vináttu og svik, óréttlæti og eftirsjá. Hún Erna sem ég vinn með sagði að eftir að hafa lesið þessa bók finnist hennar allar aðrar bækur ómerkilegar og illa skrifaðar. Að engin bók standist samanburð við Flugdrekahlauparann. Ég vona þó að svo verði ekki raunin með mig þar sem mér finnst gaman að lesa góðar bækur

Ég las líka Ilminn um daginn. Mér fannst hún alger snilld. Lýsingarnar eru svooo góðar að maður getur vel ímyndað sér hversu hræðileg lykt hefur verið alls staðar á miðöldum. Af fólki, híbýlum þeirra, og af borgum yfir höfuð.  Persónurnar eru skemmtilega skrýtnar og ógæfa fólks er sumsstaðar gerð brosleg......eiginlega fyndin. Skemmtilegur endir

Mæli með þessum bókum

Þetta veður er alveg æði. Í dag og í gær lá ég á sólbekk við laugardalslaugina og bakaðist (ógeðslega brún og sæt). Auk þess fór ég á línuskautana mína og brunaði upp og niður Sæbrautina í fallega veðrinu og  að sjálfsögðu er útsýnið yfir Esjuna og Akrafjall mjög svo smúkke á svona dögum. Á Sæbrautinni eru aðallega útlendingar sem njóta veðurblíðunnar og taka myndir af fjöllunum. Útlendingarnir eru alltaf töluvert meira klæddir en við frónbúar. Ég var t.d. í hlírabol á skautunum í dag en flestir sem þarna voru á ferli voru í síðerma bolum eða jökkum. Skrýtið fólk þessir útlendingar

Ég fór með Áslaugu vinkonu minni í bíó á sunnudagskvöldið. Þar lentum við í þeirri óskemmtilegu reynslu að afar illa lyktandi gaur plantaði sér við hliðina á okkur. Ég er ekki að tala um sterka matarlykt, djúpsteikingarlykt, hvítlaukslykt eða þessháttar heldur lykt sem er einköngu tilkomin vegna baðleysis. Ég get sagt með nokkurri vissu að þessi gaur hefur hvorki farið í bað né skipt um föt í allavega viku. Ég þekki þessa lykt strax þar sem ég vinn á geðdeild og sumir sem þangað koma hafa ekki farið í bað í langan tíma. Ég fæ nóg af slæmri lykt í vinnunni og vill alls ekki þurfa að anda að mér óþef annarra á almanna færi. Þar sem það var fullt í bíó gátum við Áslaug ekki fært okkur. Við vorum að hugsa um að fara fram og krefjast þess að fá miðana endurgreidda en þar sem við erum þrjóskupíur ákváðum að láta ekki þennan haugskítuga mann flæma okkur í burtu. Það vildi svo vel til að Áslaug var með cleanex pakka í veskinu þannig að við sátum með tissjú fyrir nefinu á meðan á myndinni stóð. Ég vona að hann hafi séð það og áttað sig á því hvað málið var. Einnig brugðum við á það ráð að maula á sterkum salltlakkrís í þeirri von að bragðið og lyktin af lakkrísnum myndi yfirgnæfa skúnkalyktina af manninum.... við höfðum ekki erindi sem erfiði í því máli. Ef fólk vill ekki þrífa sig og finnst allt í lagi að lykta eins og skítabomba á það ekki heima í samfélagi við aðra. Það ætti því að sækja um stöðu vitavarðar á afskekktum stað. Þar getur það setið í eigin skítafílu að vild. Það ætti meira að segja að banna svona fólki að eiga gæludýr þar sem þau geta ekki forðað sér undan lyktinni svo auðveldlega. Áslaug sagði eftir myndina að hún gæti hreinlega ekki verið að standa í því að fara í bíó  

Ég var númer 6 í röðinni inn í sjúkraþjálfun..... þ.e.  6. eftsta. Hefði því ekki þurft að hafa áhyggjur af að komast ekki inn

Ég er komin inn í sjúkraþjálfun...veit ekki númer hvað ég var á listanum, fæ sennilega að vita það á morgun. Er hoppandi, syngjandi, trallandi ánægð Hoppaði upp úr stólnum öskrandi.

Jæja gott fólk.... ég hef snúið aftur sem virkur þegn samfélagsins eftir að hafa setið heima og lesið námsbækur upp á síðkastið. Ég var að þreyta inntökupróf inn í sjúkraþálfunarskor í dag og í gær. Þetta próf skiptist í 6 hluta og tekur 2 daga..... það eru sem sagt 3 hlutar hvorn dag. Alls 12 klsukkustundir á 2 dögum. Það var reyndar ótrúlegt hvað dagurinn leið hratt. Þetta próf er þekkt undir nafninu Barbapabbaprófið. Sama próf er fyrir læknisfræðiskor og sjúkraþjálfunarskor og því voru um 250 manns að þreyta prófið í einu. Ég held að ég geti sagt með nokkurri vissu að hverfandi líkur eru á að nokkrum gangi vel á svona prófi, þar sem efnið er úr öllum áttum og einnig er töluvert af ýtarlegum spurningum... ekki mikið verið að spyrja um aðalatriði. Nokkrar spurningar sem féllu undir almenna þekkingu:

Hvað kallast löggjafarþing Írans ?   

Hver samdi ballet sem olli uppnámi í Moskvu þegar hann var frumsýndur árið 1911 ?  

Hvað heitir höfuðborg Mongólíu ?

Hvaða land liggur við suðurlandamæri Nikvaragúa ?

Bókmennta- og spurningar um listir voru allmargar en ekki komu margar spurningar um fyrirferðamiklar fréttir síðastleiðið ár eða svo. Ég átti von á spurt yrði t.d. um nýafstaðnar kosningar, rússneska njósnarann sem var drepinn með geislavirku efni (t.d. hvað kallast efnið), forseta erlendra ríkja, einræðisherra eða álíka.

Almenni þáttur prófsins var þó alls ekki verstur.... langt því frá...... ég myndi segja að stærðfræðin og efnafræðin hafi verið algert morð. Fólk sem er nokkuð vel að sér í þessum fögum átti í erfiðleikum með spurningarnar.

Þó mér hafi bókstaflega verið slátrað í efnafræðihlutanum þá gekk mér mun betur með aðra hluta..... mér gekk vel með 2/3 í dag og held ég komi vel út þar. Sá prófhluti snéri að úrlausn vandamála, íslensku, ensku og sögu. Ég held auk þess að mér hafi ekkert gengið verr með t.d. stærðfræðina heldur en megninu af hópnum. Ég tel að ég eigi fyllilega skilið að komast inn

Nú er bara að bíða eftir niðurstöðunum og sjá hernig mér hafi gengið samanborið við hina

Aðlagast eða líða undir lok, er enn ófrávíkjanlegt lögmál náttúrunnar. Þetta spakmæli blasti við mér í vinnunni áðan. Allar lífverur þurfa að aðlagast umhverfi sínu ætli þær að lifa af. Þetta á jafnt við um smæstu svifdýr sem og okkur mennina, og allt þar á milli. Þetta spakmæli hitti beint í hjartastað hjá mér þar sem ég flutti til mömmu um helgina. Megnið að dótinu mínu er í kössum og íbúðin hennar mömmu lítur út eins og ikea lagerinn. Það þurfti að flytja dót til og frá, niður í geymslu fóru 2 sófar, borð og 8 kassar frá mér. Allskonar dóti hefur einnig verið hrúgað inn í herbergi bróður míns sem tekur þessu öllu með jafnaðargeði (kannski að spakmælið sé mottó hjá honum). Þar sem rúmið mitt komst ekki inn í 6 fermetra herbergið sem ég hef til umráða, ákváðum við mamma að skipta á rúmum. Hún fær því yndislega rúmið mitt til afnota og ég fæ hennar (sem er ekki eins yndislegt). En ætli maður að lifa samkvæmt spakmælinu góða þýðir ekki að vola og láta deigann síga.... bara að halda haus og aðlagast. Aðlögun er klárlega orð dagsins í mínum huga og mun ég hafa þetta í huga varðandi aðra hluti. Stundum þarf maður að sætta sig við orðinn hlut og aðlagast í stað þessa að reyna að brjótast um, það tekur bara frá manni orku.

Ég tek þessu ágæta spakæmæli þó ekki þannig að fólk geti ekki haft áhrif á umhverfi sitt og breytt lífi sínu til hins betra. Að sjálfsögðu á maður að leita tækifæra og grípa þau þegar þau gefast. Einnig að vinna statt og stöðugt að því sem maður vill áorka eða eignast. Það er allt hægt ef viljinn er fyrir hendi. Ég hef ákveðið að sætta mig við að búa á hótel mömmu í smá tíma þar sem ég veit að einhvern tímann eignast ég mitt draumahús í friðsælu, grónu hverfi

Ég flyt til múttu í lok mánaðar þar sem búið er að selja íbúðina sem ég bý í. Herbergið sem ég flyt í er ca 6 fermetrar og þar sem rúmið mitt tekur 4 fermatra er ekki mikið pláss eftir kem kannski sjónvarpinu og kommóðu fyrir. Það verður sem sagt ekki hægt að skipta um skoðun í nýju/gömlu híbílum mínum. Ég stefni á að búa hjá múttu í sumar og held það verðir bara allt í fína þó það verði þröngt um mig. Kötturinn hennar mömmu býr reyndar í herberginu sem ég fæ og honum er mein illa við að aðrir leggi það undir sig. Um daginn var gestur sem gisti í kisu herbergi og hann grenjaði fyrir utan hurðina þar til gesturinn fór. Ég gæti því fengið að finna fyrir klónum á kisa litla

Ég fór á líkamsræktarráðstefnu til Blackpool um helgina. Það var mikið sprikl og algert æði   Dagskráin byrjaði kl. 8 á morgnanna og var til um 17:30 og því vorum við í tímum megnið af deginum. Á hverjum klukkutíma voru ca 12 tímar eða fyrirlestrar í boði, það var því mjög erfitt að velja. Dagskráin var svo fjölbreitt að allir gátu fundið eitthvað við sitt hæfi t.d. spinning, gólftíma, palla, dans, kickbox, pilates, teygjur og styrktaræfingar. Ég var ánægð með alla tímana sem ég fór í en þó voru nokkrir sem stóðu uppúr. Sumir kennararnir eru algert ÆÐI og í raun bara svakalegir skemmtikraftar. Maður var því argandi, gólandi, hlæjandi eða brosandi í mörgum tímum. Ég skemmti mér alveg konunglega og mun fara aftur á næsta ári... það er á hreinu   Við vorum ca 12 sem fórum saman og sá hópur var uppfullur af snillingum... mjög skemmtilegt fólk. Ég kom brosandi heim úr þessari ferð með fullt af nýrri tónlist og skemmtilegum hugmyndum Er í raun enn brosandi og alsæl....jabadabadú

Sælt gott fólk   Afhverju skrifið þið ekki í gestabókina mína þegar þið kíkið á síðuna mína. Það er slatti af fólki sem kíkir inn á síðuna en fáir sem skrifa í gestabókina mína. Ef þið viljið gleðja mitt litla hjarta megið þig gjarnan kvitta í bókina knús

Ég var að keyra í vinnuna um daginn eins og oft áður. það vildi svo til að ég lenti fyrri aftan bíl sem var með bílnúmerið BROSTU. Í stað þess að kalla fram bros hjá mér fékk ég smá klígju. Mér finnst flest af þessum einkanúmerum asnaleg og ég skil ekki tilganginn með þeim Að setja nafnið sitt á bílnúmer finnst mér allt í lagi... ekkert að því en að keyra um með númeraplötur á borð við AMOR, 2HOTFORU, GELLA, LOVE, ÁST, 2HOT eða álíka er bara vibbi (lenti einmitt fyrir aftan the lovemobile um daginn). Mér finnst að hægt væri að nota klígju bílnúmer sem refsingu þegar fólk fremur afbrot. Skikka fólk til að keyra um með ÁST eða álíka á númeraplötunni í tiltekinn tíma. Fyrir einhverjum árum síðan var einn af aðalvinningi í fegurðarsamkeppni hér á landi afnot af bíl í ár. Bíllinn var kyrfilega merktur tiltekinni fegurðarsamkeppni og auk þess var númerið á honum FEGURÐ. Held að þetta númer sé það vibbalegasta af þeim öllum. Aðstandendur keppninnar hafa væntanlega verið að tryggja að bíllinn yrði ekki mikið notaður Þessi bílnúmer eru allavega ekki að gera sig fyrir mína parta, vekja ýmist upp klígju eða kjánahroll, þannig er nú það.